Posted by: hanuof | 13/08/2010

السوق الشعبي..

 

..::بسم الله الرحمن الرحيم::..

اخبار رمضااان معاكم ؟؟

>>عشانه حر تحسوا بالعطش!!!

<<اجر وعااافيه انشالله ..الله يتقبل صيامنا

بصراحه وحشتني المدونه كثييير  اعتذر على التقصير<<فيس منحرج

بس تعرفون رمضان وعزايم وطلعات وكذا ..

هالتدوينه المفروض منزلتها من قبل رمضان بس ترتيب الصور ياخذ وقت طويل

وتعرفوني انواع الكسل..

هذرتي طوييله خل نبدئ بالمهم..

الاحساء الحبيبه(3)

جميعنا ذهبنا ورأينا التطور الرائع الذي يحدث بالاسواق والمولات..

تكيف..انارات..ديكورات..ماركات عالميه..وغيرها من الكثير

ولكن يوجد هناك جانب اخر كثيير منا يجهله وقد لم يستطع رؤيته

فكما اخبرتكم من قبل.. اهم مايميز الاحساء احتفاظها بتقاليدها وبساطتها

فهناك بكل قريه او بالاصح اغلبهم  يوجد مكان مخصص وايضا يوم مخصص

 ياتي البائعون البسطاء لعرض بضاعتهم..

ففي قريتي يوم السبت والثلاثاء ..وتماما في الصباح الباكر يبدئ الافتتاح

من قبل لم تروقني فكره الذهاب ابدا..وبدات تراودني فكره الذهاب عندما بدات الكتابه عن الاحساء الحبيبه ومايميزها

فاخذت الاذن من بابا ..وانطلقنا  انا واخي في الصباح الباكر عند الساعه 6..

لتبدئ تغطيتي.. اترككم مع الصور راجيه من الله ان تنال اعجابكم..

بين ازقه الشوارع القديمه بدات خطاي السير بشوق

للوصول ..فبدانا المسير في الصباح الباكر

وقد ظننت ان الجميع نائم ولكن هناك حدثت المفاجئه..

فحياه اخرى تولد في الصباح الباكر و تختفي عندما نستيغظ عاده وقت الظهيره..

 

 

احم احم<<بدت تتحمحم

هذا اول بائع شفناه بدايه الشارع

استأذنا منه طبعا ووافق وحسيت بقرح شوي لاني كنت خايفه من الرفض

كان يبيع اواني منزليه  للمطبخ

وهذا يبيع ملابس<<يعني هم مايشوفون 

 بصراحه ماشفت صاحبه مدري فين كان كان مختفي

هذا  هندي يبيع اقمشه

اول واحد رفض اني اصور…فصورته من بعيد

والي عاليمين سيارتهم مليانه اقمشه الي عنده جده يروح يشتري لها

الجدات يحبون الاقمشه..

هذا يوم استأذنا منه

قال مابعد ارتب المحل قلناله عادي بنصورك وانت ترتب

وصورناه. الله يعطيه العافيه.مدري وش يبيع بصراحه

صوره مدري وش تبي بالحياه

بس اظن اني كنت ابصور الشارع

هاي الحجي حبيته..قلتله حجي عادي اصورك

مافهمم علي قلتله ابي اصورك بصوت اعلى شوي

قالي صوري يابنتي صوري.

.كان بيده علبه فيها زقاير مال اول ورق وعشب مدري كيف وكان قاعد يلفها

((لاحظو زيين بيده))

الله يهديييه ويترك تدخين..

 

وكان يبيع شيبس وشوكلاه

وهذا اهم شي..طبعا كلكم تعرفووونه..بصراحه انا للحييين احبه وخصوصا لاكان مجمد يمييي

ناس يسمونه عصار ..غوار ..دندرمه

 

وهذا العطار صح  ولا لا؟؟

مادري صراحه وش يسمونه بس اهم شي يبيع عطر

حبييت هالصوره وااايد..احسها فله مدري ليش

ندرون ليش؟؟

هاي الريال شكله كان معصب او مو رايق

بس ماردنا يوم استأذنا منه قالوا تفضلوا شكله تعبان او شي<<مسويه محلله نفسيه

زي ماتشوفون يبيع مكسرات وفصفص وحلاو

 يقولون اهل الحسا مشهورين بالفصفص مدري صح ولا لا؟ماتحققت من هالمعلومه للحين

هنا كانت البياعه حرمه وشكلها بصراحه بدويه

لابسه نقاب مال اول الي لونه ذهبي..وعيت لااصورها 

قالت لي صوري السلال بس..سلاتها كان فيهم سمك صغار مجفف

اممم يسموونه (عوم) بصراحه ماعرف ليش ولا وش فايدته

 

بهذا الجزء انا استانست الف صراحه كل الموجوديين كانوا فله

هالقسم يسمونه قسم الخضره

كله وفواكه وخضروات وجي

كان هذا بالمقدمه كانه يدري ان الجح معشووقي

طبعا يوم استاذنا منه استاانس وايد وقال دقيقه خل اشيل جحتي وويوم شالها قال يلا الحين صوري

وصورته كم صور.. لاحظو الريال الي عييمنه

قالي صوريه صوريه شكله صديقه بس هذاك الريال عيه يقول توه واحد جاي ومصوره

وشاف صورته بمجله..عاد مايبي يصور

 

عاد انا ماخليييت صورت الي كان يبيعه

باميااا ..اتخيلها مع منشف دجاااج يمييييي

هذا بوعلي يبيع سنبوووسه

من يبي..السنبوسه برمضان شي اساسي عندنا

ومن يدين ماما احلى واحلى..ربي يحقظها

هذا يبيع خضروات

ولده الصغير يمين الصوره ووالده يسار الصوره

بصراحه شي حلووو الاب ويساعده ابنه وبيكون معاه

احس الطفل او الولد الصغير راح يتعلم الكثيير..

وصلنا للحماليه تعرفون وش يعني حماليه؟؟

يعني لما تشتري اغراض

هذول الاشخاص يشيلونها عنك وبمبلغ زهييييد جدا مايتعدى الخمس ريالات

هذا كان جنب راعي السنبوسه فوووق

يعني مبين زي ماتشوفون انها من ذوي الاحتياجات الخاصه ..بس ماقدر اقول عنه انه معاق بصراحه

المهم ضحكني  يقول لابو علي

ابــــو علي

قاله  ابوعلي :نعم

قاله احبــــك

قاله ابوعلي: حبتك قطووه

ويفقعون ضحك الي حوالينه طريقتهم كانت فله

يعني لو حنابصراحه

جالسين من صباح الله وحر ونشيل ونحط  ونشتغل ومدري ويش اكيد اخلاقنا بتكون استغفر الله

ولكن هم عايشين حياتهم معتادين على هذا الشي

هذا شفته وخقيييت علييييه

اول ماشفته ذكرني بفلم الكرتون (الصيااد الصغير)

كان يمشي بسرعه شكله كان مستعيل بس قلت لاخوي ناده وراح صوره ..

 هنا نقطه التجمع للحماليه الصغنونين

طبعا حتى هم استأذنت منهم..وقامو يضحكون

يقولون ::عندكم  بتصور الحمالييييه ويضحكون صرت اضحك وياهم مدري ليش

شوفوا شقد صغار..ربي يحفظهم لاهلهم

 هذا انسان هادي ورايق واحس انه موهوب كمان

اول ماستأذنا منه قال دقيقه خل اشيل الاكياس الي عالفواكه عشان تبين

لانها كانت مغلفه..وقالي تعالي من هذي الزاويه ويوم خلصت

دخلني المكان الي وراه وقالي صوري الي تبين

صورت الفواكه اللي احبهاا

والله شكلها فرش والوانها زاااهيه تشهي لللاكل

 هذا يبيع جح وقرع تعرفون القرع؟؟

ترى القرع نفس الي عند الاجانب يحفرون عليه ويه بالهالوين

بس عندنا يصير شكله غير مدري ليه..

الريال الي عاليمين سالنا انتوا من عيال منو

ويوم خبرناه قال والنعم والله وسالنا وين بتحطون الصور ؟؟!!

كلهم يحسبون جريده او مجله

اقول لاخوي لو يدرون انها لمدونتي والله مابيخلوني اصورهم

بس الحمدلله تمت العمليه بنجاح

 هذا كمااان ولد شاب يبيع شوكلاتات

كان جالس بالسياره ويوم طلبناه يوقف جنب اغراضه يصور

استحى يقوول مو لازم..اصريت عليه وبعدين نزل ربي يعطييه العافيه

 هذا الحجي كان ناايم اخر نوومه

قربت منه بشويش وحس فيني قلتله حجي عادي اصورك

قالي اي عادي

عاد بدى يعدل بشماغه وثوبه

تدرون عني احب اللقطات العفويه  صورته وهو يعدل شكله

الله يخليي دجاجته له ..

هنا طفلين

بصراحه عورني قلبي يوم شفتهم ..لاتسالوني ليش

استأذنت منهم الي عاليسار قال لا لا مابي  شكله كان مستحي

فقلتله خلاص مابصورك ..الي عاليمين عادي

عاد انا وجهت الكام وماقدرت اقاوم  حركته فصورته..

 هنا الرجل الواثق بخطواته..

كان يبيع مسجلات.. للحين في ناس تشتري مسجلات؟؟

ماعلينا كان مشغل ل قران الله يهدي الجمييع

وهو كمان سالنا وين بتحطون الصور

وقال يبي صورته فاعتذرت منه وقاله اخوي بيوديها له يوم ثاني

نظره للشارع نظره اخيره

 رجعنا انا واخوي مستانسين وااايد وكل شوي و ااحد يقول الموقف الي ضحكه . وعجبه

رجعت البييت وفرجت بابا..بابا كان خايف حد يهاوشنا او يقول شي بس الحمدلله ماصار شي

وصار هالمكان يحمل ذكره حلوه اتذكرها بذاكرتي..

وبكل مره اتفرج عالصور اتذكر طريقتي بالاستاذان وطريقتهم بالرد علي

وسوالفهم واسالتهم .

ربي يحفظهم اجمعييين..

.

.

.

ماعرف وش اقول زياده بس انشالله تعجبكم تغطيتي

بانتظار ملاحظاتكم وانتقاداتكم

 

free counters

Advertisements

Responses

  1. بصراحه تغطيه رايقه ومررررررررررره حلوه

    واهم شي الأدب والأستأذان

    وبصراحه حلو الواحد يتذكر الماضي بين فتره وفتره

    بصراحه انا اعجبتني التغطيه حيل حيل

    وفيه شي ضحكني مرررررررررره

    الحين البساطه اللي كانت تبيع لابسه نقاب ذهبي ..؟؟
    ههههههههههههههههههه
    ما يسمونه نقاب اسمه بطوله

    الله يوفقك ويسعدك وفرح قلبك زي ما فرحتي قلوبهم

    في انتظار تغطيتك الجديده 🙂

    • تسلميييين ياسوسو يادبه
      انا اورييييج تفشليني قدام الزوار
      انا اجل شدراني ان اسمه بطوله
      بس تدرين معلومه جديده تسلمين عليهااا
      ويوووفقك انتي كماااان
      فدييييت طلتك دايييم تفرحني وترفع من معنوياتي

      تغطيه جديده؟؟
      بصراحه للحين مو في بالي شي
      عندك اقتراح؟

  2. ماشاء الله عليك يالهنوف…. ابدعتي الصرااااااحه
    تغطيه مميزه جدا…. ماادري وش اقول الصراحه
    لكن اهنيك على جرأتك ونزولك السوق….

    الصراحه شفت الصور مرتين
    امس وكنت برد عليك بس انشغلت… وجيت واستمتعت وانا اتفرج عليها للمره الثانيه قبل شوي….
    كل الصور عجبتني..والحسا بعد عجبتني
    بس الصور اللي بقولها في رايي المتوضع…مميزه جدا جدا جدا
    صورة العطار اللي تحسينها فله 🙂
    وصورة الصياد الصغير هع هع هع 🙂
    بياع الفواكه وصور الفوكه ابدعتي في تصويرها…
    واللي يبيع مسجلات وهو واقف

    دمتي مبدعه 🙂
    تحياتي~~

    • احم احم شكرن شكرن على ردك الي اسعدني كثييير
      بروووح افرجيه خالاتي لان كل مره افرج وحده منهم الصور
      تقولي فشلتينا وش موديييك هناااك قهرووني صراحه..
      الحسا فيها اشياااء كثيييره لاتعد ولاتحصى انصحك بزيارتها
      اشكرك كثيير عالتواجد واسعدني ان الصور عجبتك

  3. كل عام وانتي بألف خير … ومبارك الشهر علينا وعليكي

    ……………………….

    ماشاء الله تغطية رائعه جدا جدا كتير عجبتني ….

    العصير الي كان يبيعه الرجال احنا بنسميه عصير جامد او مثلج …
    احلى شي لما انتي حكيتي شوفوا الريال على اليمين .. ضليت اتفرج واتفرج وين الريال انا فكررتك بتحكي الريال يعني ريال الفلوس هههههههههههههههههههههههههههههههههههههه
    ههههههههههههههههههههه

    بعدين فهمت انه الريال يعني الرجال هههههههه انا آسفه بس بصعوبه فهمتها …

    والاحلى من هيك وانا عم بقرأ وبتفرج حسيت حالي اني كنت معك … وفرجيتيني مناكلق جميله وبسيطه

    وكمان بتحسيهم عايشين حياه بسيطه وهادئه لانهم بسطاء كثير…

    …………………………

    الله يفرجها على الجميع

    وان شاء الله لن تكون زايارتي الاخره

    …………………………

    تحياتي…..

    • وانتي بخييير وصحه وسلامه عشوووقه
      نورتي مدووونتي المتواضعه
      ..
      ..
      ..صح كلامك هالعصير كلن ييسميه اسم
      بس اهم شي ان كل الناس تحبه من يوم حنا صغار لين كبرنا
      .
      .
      وسالفه الريال فديييييتج بس كتبتها بلهجتنا ماجى ببالي انك راح تفهميييينها فلوووس
      هههه عطيييتك معلوومه جديده صح..؟؟

      والحمدلله اني قدرت اوصل احساسي الك وانشالله للكل
      .فديييتك منوره ولاعاد تقطعيييين

  4. تحيات معطرات

    شي حلو وجميل ومميز في بلادي الغاليه

    بالذات حليلة المجد التليد

    كل الشكر على الصور رجعتي لي ذكريات زمان

    بانتظار جديدك

    سلام

  5. لا تعليق ……………………
    بصراحه ((((((((((((( تــــــــــــــــــــألق)))))))))))
    والى الأمام

  6. يــــــــآي إأهنييييج حيـــــأآتي..
    بالــــــــمرررة شششئ..=)


اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

التصنيفات

%d مدونون معجبون بهذه: